Kapitalismoa ez da inoiz hain osasuntsua izan superaberatsentzat. Aberastasunak gure bizkar haienganatzan dituzte, eta ondorioetaz axolatu gabe: gerlak, prekarietatea, pobrezia handia, bizitzaren suntsitzea...

Horren aitzinean, guk, langileok, antolatu eta borrokatu behar dugu! Izan ere, sistema errotik aldatu behar da. Langile-klaseak sortutako aberastasunak birbanatu egin behar dira, eta bizitza duina bermatu behar diete denei, natura errespetatuz. Gure bizitzak izan behar du sistemaren erdigunean, eta ez Kapitalak!

LAB sindikatua, militanteen bitartez, egunero borrokatzen da alde horretatik, kolektibitateetan, enpresetan eta karrikan. Euskal Herrian tresnak sortzearen alde egiten dugu, langileak beren erabaki- ahalmenaz jabetu daitezen. Hemen bizi eta lan egin nahi dugu, baina ez edozein preziotan! Duintasunez bizitzeko gure lan-baldintzen gainean ere erabaki eta jardun nahi dugu.

Frantses estatu ultra zentralizatuaren eta haren gobernu ultra liberalaren aitzinean, negoziazio eta erabakitzeko instantziak hurbildu behar ditugu, pribatuko zein publikoko langileentzat. Indar harreman bat sortu behar dugu gure lansarien eta pentsioen igoera eskatzeko, emazteen eta gizonen arteko soldata arrakalarekin berehala amaitzeko, zerbitzu publikoak indartzeko...