"Sindikatuen kide kopurua inoiz baino apalagoa den garai honetan (justu %8), ez da normala sindikatu batzuk hauteskunde profesionaletatik marjinalizatuak eta baztertuak izatea", ohartarazi du Ziburuko diputatuak. LAB Ipar Euskal Herriko sindikatuen paisaiaren parte dela dio eta bazterketa hori "libreki [horren] kide izatea hautatu duten langileentzat demokrazia soziala ukatzea litzatekeela" gehitu du.

David Idiart abokatuak irakurri du sustengu gutun hori, auzitegian. Euskararen Erakunde Publikoaren agiria ere zuzendu die epaitegiari. Justiziari bere lana egiten utzi nahi diola adierazi ondoren, bere jardueran Ipar Euskal Herriko eragile sozialak euskararen normalizazioan engaiatzera bultzatzen dituela zehaztu du. LABek bere estatutuetan hizkuntza horren alde duen atxikimenduari babesa adierazteko manera bat.

Hori baita, funtsean, CGTk leporatzen dion ezaugarrietako bat : izaera euskalduna. "Ez dute onartu nahi gure weborrian bi hizkuntzak erabiltzen ditugula, euskara eta frantsesa", harritu da Eñaut Aramendy auzitik ateratzean. "Euskaldunei soilik zuzentzen girela errateko baliatzen dute hori", zehaztu du.

Abuztuaren 4an

Balore errepublikarren kontra joateaz gain, hori da leportazen dion beste trabesa : errepresentatibitate eskasa. Slim Ben Achour CGTko abokatuak sindikatu bat baino, LAB alderdi bat dela salatu du. Korsikako STC sindikatarekin berak eta beste sindikatu frantses batzuek egin duten bezala, proiektu politiko baten alde lan egiten duela erran du.

Alabaina, sindikatu abertzaleak hori batere sinisten ez duen Solidaires sindikatuaren sustengua ukan du Bordaleko auzitegian. NPA alderdiko Philippe Poutouk hor izateko gogoa adierazi du, nahiz eta ez duen etorri ahal izan. Abuztuaren 4an emanen dut epaiaren erabakia epaileek eta CGTk nahiz LAB-k elegitea aurkezten ahalko dute.