2026-2027: antolakuntza kolektiboa, ekintzak eta elkargunea

Irailaren 10eko «Dena Blokea Dezagun» egunak eman zion hasiera 2025-2026ko ikasturteari. Sare sozialetan abiatutako ekimenak tokiko eta praktika izaera hartu zuen, asanblada herrikoiak antolatuz. Egunak berak blokeoak eta errepresioa ekarri zituen, baina, batez ere, ordura arte elkarrekin hitz egiten ez zuten pertsona antolatuek zein antolatu gabekoek ekintza kolektiboan bat egitea.

Eta espiritu horrekin egin behar dugu militantzia: antolakuntza kolektiboa, ekintzak eta elkargunea. Ildo horretan, LABek sindikatuen arteko elkarrizketa abiatu du datorren irailaren 29an greba-egun indartsu eta bateratua eraikitzeko.

Iaz hasitako lanaren eta 2025eko urriaren 9ko elkarrekin eraikitako greba-egunaren jarraipen gisa, garrantzitsua da gure sektoreetan antolatzen diren mobilizazio eta greba-egunak elkartu eta indartzea, bereziki gizarte-zerbitzuetan, gizarte- eta osasun-arretan eta administrazio publikoan.

Zerbitzu publiko onak guztiontzat dira eta defendatu beharrekoak; langileen lan-baldintzak, berriz, gure borrokaren lehentasunetako bat dira. Epe garrantzitsu bat hurbiltzen ari da: Funtzio Publikoaren hiru eremuetako hauteskunde sindikalak. Herriko etxetako eta lurraldeko langileak, irakasleak, ospitaleetako langileak: unea da zuen lantokietan antolatzeko! Aste batzuk ditugu gehienezko lantoki kopuruan LABen hautagaitzak aurkezteko, eta bertan borrokarako eta eraldaketarako sindikalismoa bultzatzeko.

Herriko Etxeetan, ospitaleetan eta hezkuntzan ordezkatuak eta antolatuak egotea indargune bat da, baliabide-murrizketen aldeko erabaki politikoek gure lanpostuak mehatxatzen dituzten, gure lan-baldintzak okertzen dituzten eta gure hizkuntza, euskara, arriskuan jartzen duten garai honetan.

Euskararen garaia da, gure hautua: euskara!

LABek datorren azaroaren 21ean Baionan egingo den manifestaziora deitzen du. Euskal Konfederazioak mobilizazio herritar handi bat antolatu du, beste behin ere euskararekiko dugun atxikimendua erakusteko. Baina hori ez da nahikoa: ofizialkidetasuna ezinbesteko baldintza da gure hizkuntzak bizirik iraun dezan. Are gehiago, egungo testuinguru berezi eta kezkagarrian.

Eskuin muturrak bere gaiak eta lehentasunak inposatzen ditu. Jada ez da hori salatzearekin nahikoa; horri aurre egiteko antolatzeko unea da. Azken probokazioa: Frantziako Kanonak «Banquet basque» izeneko ekitaldi bat antolatu du datorren azaroan Biarritzen. Beste hainbat eragilerekin batera, eskaera bat jarri dugu martxan, auzapezari eta balizko hornitzaileei presioa egiteko. Sinatzeko, klikatu hemen: https://labur.eus/m1einvh0

Faxisten aurrean, langileen ahotsa aktibatu eta entzunarazi behar dugu, gure antidotorik onena sindikalismo borrokalaria, feminista eta arrazakeriaren aurkakoa baita. Eta, jakina, baita ezkerreko sindikalismo abertzalea ere, erabaki-guneak gerturatzea eta benetako indar-harremana sortzea helburu duena, Parisek eta Madrilek gure ordez erabaki ez dezaten! Hemen erabaki dezagun!

Kapitalistek etengabeko krisi ekosoziala eragiten dute. Gizarte bidezko, solidario eta jasangarri baten alde antolatzen eta borrokatzen jarraitu behar dugu.